[08.07.07-12.07.07]泰國之旅第三天

[10.07.07]泰國之旅第三天 (天晴)
今日轉酒店由曼谷去芭堤雅, 一早執定d行理放係架旅遊巴到, 食過早餐, 8點半出發......

昨天勁買嘢之後, 今日勁玩.....

第一站又係d "必"到鴨仔地點, 跟住11點就食午餐, 好早呀....今日午餐係泰式任食火鍋, 但又係d 見到都唔想食既嘢, 嗚........ 佢既湯底係清水, 原來泰國人鍾意用清水打邊邊, d 團友話d 肉好鮮, 但我就唔覺.....

食完飯就去老虎樂園, 很期待同老虎仔影相, 終於影到, 今次好抵, 一個價錢影足2次, 因為第一次影得唔靚, 可以再影過, 抵.....不過隻老虎仔都唔係老虎"仔", 有d失望......跟住去睇豬乸計數同豬仔賽跑, 不過冇嘜特別, 呢個樂園仲可以同其它動物影相, 有蠍子, 網蛇, 猩猩等等... 不過就唔係好吸引, 見到個女團友同條網蛇影相, 見佢條蛇又圍身又圍頸, 見到都驚, 而家d 妹妹仔真係勇呀.......

玩完老虎仔, 跟住去騎象, 包行一個圈, 之前冇老虎"仔", 今次就嚟隻象仔, 我哋隻象好明顯比其它象細隻, 佢雖然細但行得一d 都唔慢, 唔知係咪我太肥佢想快d 行完掛, 佢仲好叻咁識行捷徑, 大路唔行鍾意行d小路, 好搞笑.... 我哋騎象好似賽象咁, 過完一隻又一隻, 最後過咗4隻象, 哈哈...騎完象仔仲可以餵佢哋食椰青, 佢哋好鍾意食嫁...




呢2個節目我一向都好期侍, 因為我對d 動物都好有興趣, 不過見到d 小動物比人用嚟謀利, 就好心痛, d工作人員為咗令d老虎仔坐定定比人影就比佢飲奶, 佢就會乖乖咁飲奶咩都唔理, 但見隻老虎飲嗰時好似餓咗好耐咁, 就好心痛.......仲有d大象, 呀信話大象係泰國好尊重既動物, 全國大約有400隻, 但都要攞嚟騎, 同埋見d 象背部好明顯有條骨凸咗出嚟, 因為比人騎得多, 諗起都覺得好可憐... 但一場去到冇理由唔玩......

去完玩之後就返酒店check-in, 終於嚟到酒店, 我哋間酒店對住個沙灘, 我哋間房既邊邊都望到個海景, 唔錯呀.........忍唔住又影返張先 ......

係酒店食咗晚餐之後, 就繼續夜遊, 芭堤雅既夜生活多姿多彩, 不過d活動就要自費啦, 導遊推介咗幾個活動, 分別係食宵夜, 玩信不信由你套票同睇真人show......我哋就揀咗去royal garden plaza玩信不信由你套票, 套票包括玩:

1)鏡迷宮

2)鬼屋

3)信不信由你博物館

4)4d動感影院

3係香港都有, 泰國嗰個就差唔多, 唔同既就係佢既解釋係英文同泰文, 4嗰個就短咗d, 話咁快就玩完......1同2香港冇得玩, 都幾好玩, 不過就細咗d, 1嗰個有好多個唔同佈置既房間6面都係鏡, 你要係每個房間搵出口去另一個房間直至搵到個出口, 加上d音效同特別既燈光都幾刺激嫁....... 跟住就玩鬼屋, 如果我係香港一定唔會玩, 不過見咁多人陪去玩吓啦, 計埋2個本地人, 我哋一行10人由導遊帶頭迫入間鬼屋,(我排尾三..嘻) 起初都有d驚, 但玩耐咗同埋我d團友擺明唔驚既心態去玩, 玩玩吓又唔係好驚, 我記得仲有隻鬼忍唔住笑, 佢好唔專業喎...因為我哋停留係一個地方好耐都唔走, 睇吓隻鬼有咩搞作, 點之隻鬼用國語講"快點走!!!!!"..... 勁搞笑呀...... 就係咁無驚無險就玩完........不過如果係香港再玩, 我一定唔會玩.......

聽日出珊瑚島, 原來我唔記得帶短褲, 唯有臨急臨忙買, 平時香港買$10既短褲, 係芭堤雅賣$40....真貴.....買完就返酒店休息.....

是日早餐: 酒店自助早餐

是日午餐: 任食邊邊 + 清湯底

是日晚餐: 酒店內中國菜