[08.07.07-12.07.07]泰國之旅第一天

[08.07.07] 泰國之旅第一天 (香港/泰國天晴)

今日8點半機, 昨天導遊打嚟話6點鐘係機場集合, 我見咁早, 即刻問佢如果趕唔切嚟點算呀....佢話最遲6點半, 好彩.....唔係真係唔知點算......今日我同mandy搭頭班車去機場, 6點4去到機場....

今日8點幾上機, 搭咗2個幾鐘機10點幾到達Suvarnabhumi Airport, 一落機天氣好好good........

落機搭旅遊巴去我哋既行程, 未上車前有2位泰國靚女幫我哋帶2條花帶同影咗張"靚"相, 跟住就上車, 之後就見到我哋個導遊, 信叔叔....初初見佢真係冇嘜好感, 可能佢係一個四十幾歲既叔叔, 同埋佢講既嘢不停重覆重覆再重覆, 或者上次去台灣既導遊小芬好好, 佢講嘢好好聽, 相比之後就覺得佢冇咁好, 不過玩咗幾日同佢熟咗, 佢都幾搞笑..不過唔記得同佢影相, 另外, 今次個領隊係Leslie, 呢個領導都唔錯, 夠細心, 一去到已經比晒酒店同導遊領隊既聯絡方法, 驚我哋走失, 同埋佢去每個地點都會叫我哋注意d咩, 仲有佢每日返酒店前都會寫底聽日既集合時間落張紙仔到, 可識佢唔係好受d"靚妹"歡迎, 因為佢每次落車都會做一個動作.....

第一站, DREAM WORLD (夢幻樂園), 去到第一件事, 又係影"靚"相, 呀莎話呢個係泰版荔園, 所以對呢個公園都冇嘜期望, 去到就比想像中好, 可能我以為好殘, 但都唔算太殘, 如果敢玩, 都幾多嘢玩, 不過佢D 機動遊戲好鬼細, 我咁大隻差D迫唔入, 我哋去嗰日咁啱有間小學去旅行, 所以都幾多人。

其中2個嘢呀leslie叫我哋唔好玩 - 海盜船/大峽谷, 因為會濕晒身, 但我同mandy 照玩, 最後濕晒, 不過都好刺激.........之後去睇呀信介紹睇既hollywood action, 佢係一個真槍實彈既真人show, 可能第一次睇, 都ok 好睇, 佢d 火藥真係好真嫁........仲有個叫雪城既嘢, 入去玩雪, 泰國咁熱, 入去過吓冷河都唔錯, 不過規定一定要著佢d褸同水鞋, 全部呀公, 諗起都唔衛生..........就係呢個公園玩咗4個鐘, 去完諗返起都幾"牙煙" 其實佢好多機動遊戲既安全設拖就係一條"魔術貼", 不過算啦都玩完囉.....

跟住第二站, 去睇人妖show, 第一次睇.. 不過呢d嘢都唔係好啱我哋, 反而d 老一輩既好鍾意睇, 隔離嗰對夫婦睇到勁興奮, 我睇咗一陣就心諗, 做完未呀.......佢仲要做成個鐘添, 唉, 不過d人妖真係好索仲好妖添, 仲索過d"真正女人", 佢勁同d"麻甩老" 放生電, 好搞笑.....後尾聽返個導遊講, 話d人妖要食好多藥, 打好多針同差唔多全身整晒先有呢個效果, 諗起都覺得辛苦, 同埋佢哋最多做到40歲咋,唉..真係慘, 不過見佢哋好享受做人妖, 可能佢哋覺得值得啦........跟住就係曼谷遊車河, 遊完就返咗酒店.......今次間酒店係市中心, 返酒店後落街買嘢都好方便呀......

是日早餐: 飛機早餐 - 三文治

是日午餐: 加大碼KFC

是日晚餐: 泰式中國菜