[08.07.07-12.07.07]泰國之旅第二天

[09.07.07]泰國之旅第二天 (天晴)

可能昨天搭飛機辛苦, 今日9點先集合, 未出發前係酒店影咗2張靚相.....

食過早餐之後就出發, 今日成日都係去shopping...

朝早就去咗幾個"必"去既鴨仔地方, 蛇園/燕窩專門店/泰式皮具城, 雖然d人介紹隻產品講到好好, 講到天上有地下無, 但都係冇斬獲, 除咗去咗皮具城幫人買咗個魔鬼魚銀包, 都冇買嘢....仲有食咗碗燕窩..同香港嗰d差唔多, 冇嘜特別, 一場嚟到食返碗....成為200珠.....

跟住去食午餐, 食午餐時見到成街既人都著住黃色衫....

聽呀信講返, 原來泰國人為咗紀念皇帝登位60年, 佢哋逢星期一都會著黃色既衫, 原來泰國人係咁團結嫁...

食飽飽繼續去shopping, 本應佢有個行程係拜四面佛, 可以揀去定唔去, 我哋佛祖係心既, 緊係揀後者啦, 跟住就去咗central world同big c shopping, 之前上網睇話big c 有好多平靚正既嘢, d人仲去完又去, 我同mandy第一時間去掃嘢先, 佢似平同大版既city super 咁, 真係好平, 細至茶米油鹽大至電單車都有得賣...十幾蚊有件衫, 廿蚊有條褲, 仲有好多好平既名牌巴巴, 不過最後都係淨係買咗d零食, 跟住就係去central world, 係一個好多名店既地方, 好多牌子香港都有, 價錢又相若, 所以都冇買, 淨係買咗個袋, 佢係一個泰國幾出名既牌子, "NaRaYa"..本身冇諗住買, 點之有個團友話好平, 好平, 我見佢個價錢唔貴, d 款香港又冇,咪買囉... 佢仲有銀包, 筆袋,化粧袋, 廁子筒, 同好多大大細細既隔棉袋, 價錢都係40珠至6百幾珠到....都抵嫁...終於買咗d嘢比自己.......

跟住就去食晚餐, 食完6點幾繼續去shopping, 去行suan lum night bazaar 跳蚤市場, 之前網上都有人話呢個夜市好多嘢行, 所以都好期侍, 呢個夜市好大, 分3part, 呀信比咗2個鐘我哋行, 但都唔係好夠時間行, 唔知係咪太大, 行完之後諗住轉頭先買, 點之搵唔返間嘢.....似終係旅遊區, 導遊叫我哋講價, 講到7成就差唔多, 不過一講即刻肯減呀...... 咁又係..去外國買嘢就好似有"水魚"2個字刻係額頭咁, 唔講點得.. 見到好多好有特色既嘢, 但係唔敢買, 一買返去一定比人鬧..博唔過.. 行到9點幾, 夠鐘返酒店, 唔知係咪夜市既關係, 好多舖頭先啱啱開門, 但夠鐘走冇得繼續行.......

今日返酒店數吓用淨幾多錢, 一數之下, 原來用得七七八八, d 錢都唔知洗晒去邊.....

是日早餐: 酒店自助早餐

是日午餐: 中國人開的中國菜館(終於似返d 樣)

是日晚餐: 地道泰菜 (超難食)