婆婆生日&母親節

一年一度既母親又到, 婆婆又係5月生日.. 所以年年都會係母親節慶祝埋生日, 今日見返好多親戚, d表弟妹活潑咗好多, 唔知係咪讀書既關係, 見到d 耐冇見既人都唔會再怕羞, 仲有, 我表姐下個月尾預產, 真係好, 遲d又多個b 玩, 到時我就榮升做.......覺得自已好老添....

我家姐整咗個蛋糕慶祝吓, 今年整咗個熱情果芝士, 係呀儀佢哋係工聯會學既, 因為食過好好食, 所以想整吓.....

今次冇整到面嗰層熱情果jelly, 好似冇咁好食咁, 下次都係整返la, 同埋個海棉蛋糕浮面.. 好驚呀...今次諗住買多d 生果放落去, 睇落會豐富d, 點之, 臨放一刻, 唔知點砌靚佢, 越整越核突咁, 最後都好求奇咁整咗, 好在家姐之前買咗幾塊朱牌, 可以遮一遮醜即..... 下次都係淨係買士多啤啤算la......

唔知係咪今年經濟好既關係, 酒樓都爆晒, 訂枱都要訂6點, 唔係好晏先可以訂枱, 6點鐘就落咗去開餐, 咁早食真係唔係好慣, 我哋未座定, d 餸已經上緊, 好似好趕咁.....咁又係, 母親節間間食肆都想做多2轉...最後食完飯8點半, 返到屋企仲趕得切睇蔡瀾, 今集講泰國嘢食, 睇咗成集最多唔係泰國菜, 而係d蒼蠅, 每一個場景總有2隻係左近呀.......